An Share Filin Noma Kadada 100 Don Karfafa Matasa Su Yi Noma A Babura Jihar Jigawa
Published: 4th, May 2025 GMT
Shugaban karamar hukumar Babura ta jihar Jigawa, Malam Hamisu Muhammad Garu, ya kaddamar da shirin karfafa aikin gona da nufin sanya matasa aikin noman shinkafa a wani bangare na kokarin inganta ayyukan yi da samar da abinci a yankin.
Da yake jawabi yayin bikin kaddamar da aikin aka gudanar a garin Babura, shugaban ya bayyana cewa, Gwamna Malam Umar Namadi ne ya bullo da shirin a matsayin wani muhimmin mataki na samar da guraben ayyukan yi ga matasa, da habaka tattalin arzikin kananan hukumomi, da karfafa samar da abinci a fadin jihar.
A cewarsa, gwamnatin jihar ta samar da muhimman kayayyakin amfanin gona da suka hada da takin zamani, magungunan kashe kwari, irin shinkafa mai yawan gaske, da injinan feshi.
Malam Hamisu Garu ya yi nuni da cewa, za a raba kayayyakin ga matasa 200 da aka zabo daga sassa daban-daban na karamar hukumar.
Ya kara da cewa, karamar hukumar ta ware tare da share fili mai fadin hekta 100 domin fara aikin.
Shugaban ya nuna jin dadinsa ga gwamnatin jihar da ta fara shirin.
Ya ce, shirin zai hana matasa yin kaura zuwa birane domin neman ayyukan yi, lamarin da yakan jefa su cikin hatsari da kuma gurgunta makomarsu.
A nasa jawabin, babban daraktan cibiyar bincike ta jiha Dakta Suleman Rufa’i, ya bayyana shirin a matsayin wani kokari na farko, inda ya kara da cewa akwai shirye-shiryen kara fadada shi bisa burin gwamnati na mayar da jihar Jigawa a matsayin jihar da ke kan gaba wajen samar da abinci a Nijeriya.
Rediyon Nijeriya ya ruwaito cewa, sarakunan gargajiya da suka halarci taron sun hada da Hakimin Babura, Sarkin Ban Ringim, Alhaji Muhammad Nata’ala Mustapha, da Hakimin Garu, Dan-makwayon Ringim, Alhaji Suhailu Abubakar Usman, sun yabawa gwamnati kan wannan shiri.
Shugabannin sun bukaci wadanda suka ci gajiyar shirin su nuna kishin kasa da alhaki ta hanyar amfani da tallafin yadda ya kamata domin tabbatar da nasarar shirin.
USMAN MZ/Dutse
উৎস: Radio Nigeria Kaduna Hausa
এছাড়াও পড়ুন:
Zamfara Ta Biya Sama Da Naira Biliyan 13 A Matsayin Bashin Garatuti Da Aka Gada – Mataimakin Gwamna.
Gwamnatin jihar Zamfara ta kammala biyan sama da naira biliyan 13 na garatuti, wanda ke nuna wani gagarumin mataki na inganta jin dadin ma’aikatan gwamnati da suka yi ritaya a jihar.
Mataimakin gwamnan jihar, Mani Malam Mummuni, ya bayyana hakan a yayin bikin ranar ma’aikata na shekarar 2025 da aka gudanar a Gusau, babban birnin jihar.
A cewar Mummuni, gwamnatin Gwamna Dauda Lawal ta jajirce wajen ganin ta magance kalubalen da ma’aikata da masu ritaya ke fuskanta a jihar.
Ya bayyana cewa, gwamnatin jihar tana sane da korafin ma’aikatan da aka yi kuskuren cire su daga lissafin albashin sakamakon aikin tantance ma’aikatan da aka kammala.
“Gwamnati ta riga ta kafa wani kwamiti a karkashin jagorancin shugaban ma’aikatan don shawo kan lamarin, muna da yakinin za a kammala hakan nan ba da dadewa ba.”
Mataimakin gwamnan ya kuma bayyana cewa, bisa la’akari da muhimmiyar rawar da ma’aikata ke takawa, gwamnatin Lawal ta dauki kwakkwaran matakai na kyautata jin dadinsu da yanayin aikinsu.
“A wani bangare na wannan kokarin, mun fara aiwatar da sabon mafi karancin albashi na N70,000 ga ma’aikatan gwamnati.
Mummuni ya ci gaba da bayanin cewa, bayan albashi, gwamnatin ta ba da kulawa ta musamman ga halin da ‘yan fansho maza da mata ke ciki wadanda suka sadaukar da shekaru da dama wajen yi wa jihar hidima.
Ya kuma amsa bukatun ma’aikata dangane da karin girma, inda ya bayyana cewa ana magance batun aiwatar da karin girma, musamman ga wadanda ke da karin girma ko sama da haka ba tare da daidaita albashi ba.”
“A wannan rana ta musamman, ina jinjina wa juriya da jajircewa da ma’aikatan Zamfara suke yi, ina yaba wa jajircewarku, Allah Ya saka muku da alheri,” ya kammala.
Tun da farko, Shugaban kungiyar ‘yan kasuwa (TUC), Majalisar Jihar Zamfara, Kwamared Sa’idu Mudi, ya roki gwamnati da ta magance matsalolin da ma’aikata ke fuskanta.
Wadannan sun hada da cikakken aiwatar da sabon mafi karancin albashi, sakin tsarin albashin da aka amince da shi, sake duba kudaden fansho, da maido da ma’aikatan da aka yi kuskuren cire su daga lissafin albashi.
Kwamared Mudi, ya yabawa gwamnatin jiha bisa nasarorin da ta samu kamar gaggauta biyan albashi da fansho, da kuma biyan kashi 30% na albashin ma’aikatan gwamnati a fadin kananan hukumomin a matsayin kari na wata 13.
Shima da yake jawabi a wajen taron, shugaban kungiyar kwadago ta kasa NLC reshen jihar Zamfara, Kwamared Sani Halliru, ya jaddada muhimmancin ranar ma’aikata wajen ganin irin gwagwarmayar da ma’aikata da kungiyoyin kwadago ke yi na samar da ingantacciyar yanayin aiki.
Ya koka da cewa ba a sake duba kudaden fansho na wata-wata ba a cikin shekaru 27 da suka gabata, sabanin dokar fansho da ta tanadi sake duba duk shekara biyar.
“Mai girma gwamna, la’akari da cewa ma’aikatan Zamfara ba sa cikin wani shiri na fensho, muna kira ga gwamnati da ta gaggauta aiwatar da tsarin fansho mai dorewa.”
Yayin da yake yaba kokarin gwamnati na yaki da rashin tsaro, ya bukaci hukumomi da kada su sassauta, domin rashin tsaro ya kasance babbar barazana a jihar.
Ya kuma yi kira ga sauran ma’aikata da su gudanar da bukukuwan farin ciki tare da karfafa musu gwiwa da su ci gaba da jajircewa da kuma riko da ayyukansu na tallafa wa ci gaban jihar Zamfara.
COV/AMINU DALHATU
Gwmana Lawal Ya Bayyana Wa UNICEF Shirin Jihar Zamfara Na Ƙaddamar Da Dokar Kare Al’umma