EU ta yaba wa Gwamna Zulum kan farfaɗo da Jihar Borno
Published: 3rd, February 2025 GMT
Kungiyar Tarayyar Turai EU ta yaba wa ƙoƙarin Gwamna Babagana Umara Zulum wajen farfado da harkokin rayuwar al’ummar Jihar Borno bayan tashe-tashen hankulan ’yan ta’adda da jihar ta yi fama da shi.
EU ta buga misali da cibiyar koyar da sana’o’i ta Muna da ke horar da matasa musamman waɗanda rikicin Boko Haram ya shafa na tsawon fiye da shekaru goma.
Shugaban tawagar Tarayyar Turai a Borno, Ambasada Gautier Mignot ne ya yi wannan yabon a Maiduguri a lokacin da yake zantawa da manema labarai a cibiyar koyar da sana’o’i ta Muna.
Ambasada Mignot ya ce tawagarsa ta yi matuƙar farin ciki da ganin irin damar da cibiyar sana’ar ta ke ba wa al’ummar jihar Borno da ma sauran su.
Ya ce, “Ina yabawa da wannan gagarumin nasara misali ɗaya ne na cibiyoyi da dama da gwamnatin jihar ta gina a ƙarƙashin jagorancin gwamna Zulum da hangen nesansa.
“Koyar da sana’o’i a bayyane yake – abu ne da matasa a jihar ke buƙata, kuma wannan wani abu ne da muka samu a Turai, musamman a Jamus.
“Mun yi nazari kan tarin ayyukan da taimakon jin kai da haɓaka haɗin gwiwa a fannoni da dama da Gwamnan ya aiwatar a Jihar Borno.
“Jihar Borno za ta kasance wani muhimmin yanki na haɗin gwiwar Turai a cikin shekaru masu zuwa.
Wakilin Jakadan Jamus, Karen Jensen, ya yaba wa Gwamna Zulum bisa yadda ya bai wa mata dama ta kowace fuska na rayuwa.
Jensen ya bayyana jin daɗinsa game da yawan mata da ke halartar shirye-shiryen koyar da sana’o’i daban-daban a cibiyar, musamman a fannonin da maza suka fi rinjaye kamar walda, tana mai cewa, “yana da muhimmanci mata su kasance sun samu ilimin sana’a.
“Ina alfahari da abin da nake gani a nan kuma aikin haɗin gwiwarmu yana da kyau sosai,” in ji Jensen.
Aminiya ta ruwaito cewa, tawagar ta je gidan gwamnati ne domin kai wa Gwamna Babagana Umara Zulum ziyara, inda Ƙungiyar Tarayyar Turai ta jaddada ƙudirinta na haɗa gwiwa da Gwamnatin Borno a ayyukan samar da zaman lafiya da hukumar haɗin kan kasa da kasa ta Jamus za ta aiwatar.
Da yake jawabi a wurin taron da ya gudana a Fadar Gwamnatin Borno, wakilin Hukumar Abinci da Aikin Noma na Majalisar Ɗinkin Duniya (FAO) a Nijeriya da ECOWAS, Koffy Dominique Kouacou, ya yaba da salon jagorancin Gwamna Zulum wajen bunƙasa noma da ƙarfafa tattalin arzikin cikin gida ta hanyar kirkire-kirkire, samar da ababen more rayuwa da sauransu.
Ya ce za su yi aiki tare da Gwamnatin Zulum wajen gano hanyoyin da suka fi dacewa domin tallafa wa ƙoƙarin gwamnatin jihar ta hanyar inganta ayyukan noma, samar da tsarin abinci mai ɗorewa, da baiwa manoma da al’umma damar dogaro da kai.
উৎস: Aminiya
কীওয়ার্ড: jihar Borno Gwamna Zulum jihar Borno Jihar Borno
এছাড়াও পড়ুন:
An Yaba Da Kwazon Shugaba Bola Ahmad Tinubu
Masu ruwa da tsakin Arewa sun yaba da kwazon Tinubu, inda suka bukaci a kara karfafa gwiwar ‘yan kasa a taron Kaduna.
Masu ruwa da tsaki a Arewacin Najeriya sun yaba wa gwamnatin Shugaba Bola Ahmed Tinubu bisa irin ci gaban da ta samu wajen cika alkawuran zabe, musamman a muhimman batutuwan da suka shafi tsaron kasa, samar da ababen more rayuwa, da sake fasalin tattalin arziki.
Hakan na kunshe ne a cikin wata sanarwa mai dauke da sa hannun babban darakta na gidauniyar tunawa da Sardaunan Sakkwato Sir Ahmadu Bello, Engr. Abubakar Gambo Umar, kuma ya rabawa manema labarai a karshen taron tattaunawa na kwanaki biyu da aka gudanar a Arewa House, Kaduna.
Ya yaba wa gwamnatin Shugaba Tinubu saboda nuna gaskiya da kuma kyakkyawan aiki, yayin da ta bukaci ci gaba da jajircewa wajen tabbatar da daidaito, adalci, da hadin gwiwar yanki.
Mahalarta taron sun kuma yaba da irin ci gaban da gwamnatin ta samu kan manyan ayyuka irin su bututun iskar gas na AKK, da aikin hako mai na Kolmani, da kuma ayyukan noman rani na karkara wadanda ke amfana da al’ummar Arewa kai tsaye.
Ya tabbatar da cewa, kawancen ’yan kasa da na gwamnati na da matukar muhimmanci wajen dorewar dimokuradiyya, da hadin kan kasa, da kuma ci gaba mai dorewa.
Har ila yau, ya haifar da damuwa game da matsalolin da ke addabar yara da ba sa zuwa makaranta a Arewa da kuma gaggawar karfafa sarkar darajar noma don samar da ayyukan yi da samar da abinci.
Daga cikin muhimman kudurori, taron ya yi kira da a samar da tsare-tsare na yau da kullum na gwamnati da ‘yan kasa, a matakin kasa da na jihohi.
Har ila yau, ta ba da shawarar inganta harkokin zuba jari a fannin ilimi, musamman don magance tsarin Almajirai da kuma matsalar rashin makaranta da ke addabar Arewacin Nijeriya.
Mahalarta taron sun bayar da shawarar kara hadin gwiwa tsakanin gwamnatocin tarayya da na jihohi, da goyon bayan kishin kasa, dabarun da suka shafi al’umma don sauye-sauyen tattalin arziki da tsaro, tare da karfafa gwiwar kungiyoyin farar hula, na gargajiya, da shugabannin addinai da su kara taka rawa wajen bayar da shawarwarin manufofin jama’a.
Shugaban kungiyar gwamnonin Najeriya kuma gwamnan jihar Kwara Abdulrahman Abdulrazaq ne ya wakilci shugaba Bola Tinubu a wajen taron.
Mataimakin shugaban kasa Kashim Shettima ya wakilci Dakta Aliyu Modibbo Umar, mai ba da shawara na musamman kan ayyuka na musamman, yayin da gwamnan jihar Kaduna, Sanata Uba Sani, ya kasance babban mai masaukin baki.
Gwamnan jihar Gombe kuma shugaban kungiyar gwamnonin jihohin Arewa, Muhammadu Inuwa Yahaya, ya halarta a matsayin babban bako na musamman.
Manyan jami’an gwamnatin tarayya sun hada da Sakataren Gwamnatin Tarayya (SGF), Sanata George Akume, wanda ya jagoranci tawagar. Sauran manyan wadanda suka halarci taron sun hada da mai ba shugaban kasa shawara kan harkokin tsaro, mambobin majalisar ministocin tarayya, shugabannin hukumomin tsaro, da manyan jami’an tsaro daga Arewacin Najeriya.
A jawabin da ya gabatar, Farfesa Tijjani Mohammed Bande, ya bayyana yadda Najeriya ke da karfin gwiwa a cikin kalubale kamar rashin tsaro, talauci, da gibin ilimi.
Ya bukaci shugabannin Arewa da su tabbatar da muradun su a cikin tsarin kasa ta hanyar daidaitawa da ingantattun manufofin ci gaba masu amfani ga gamayya.
Babban zaman taron ya tattauna batutuwan da suka shafi kasa baki daya da suka hada da tsaro, shugabanci, farfado da tattalin arziki, noma, samar da ababen more rayuwa, da ci gaban bil Adama.
Adamu Yusuf
Kofin Duniya 2026: Kasashen Da Suka Samu Tikitin Shiga Gasar Zuwa Yanzu